Ceir coetiroedd collddail cymysg yn neau’r Fwrdeistref Sirol ac yn y Cymoedd ar hyd eu hochrau isaf. Maent yn nodwedd yn ardal Taf Elái ar gyrion y Cymoedd ac mewn rhan helaeth o Gwm Cynon. Yn aml bydd y coetir cymysg clasurol yn y tir isel yn cynnal coed derw aeddfed (yn amrywio o’r dderwen mes coesynnog yn y tiroedd isaf, i goed derw mes di-goes ar ochrau’r cymoedd) yn ogystal â chymysgedd yn aml o goed hybrid, coed ynn, coed llwyfen lydanddail, coed ffawydd a masarn. Prif rywogaeth yr is-haen yw coed cyll, ac mae nifer o goedwigoedd yr iseldir yn cynnwys hen goedlannau o goed cyll, tra ceir coed celyn yn aml a’r rhain weithiau’n brif rywogaeth. Yn y coedwigoedd deheuol, mae coed masarn bach yn rhywogaeth frodorol allweddol (er nad yw’n un frodorol yn bellach i’r gogledd) ond mae drain gwynion a drain duon yn aml yn elfennau bach ynddynt neu’n gysylltiedig â’r ymylon, llennyrch neu goetir eilaidd mwy diweddar.

 

Ceir coed gwern, helyg, bedw llwyd, breuwydd a gwifwrnwydd y gors mewn mannau dwrlawn ac mae coed afalau surion yn nodwedd mewn nifer o goedwigoedd.  Mae fflora’r llawr yn gyfoethog ac amrywiol, gyda chlychau’r gog, blodau’r gwynt, briallu, craf y geifr a fioledau cyffredin a thyfiant rhedyn toreithiog yn cynnwys y farchredynen gyffredin, rhedynen Fair, y farchredynen lydan, y wibredynen a thafod yr hydd. Ceir llwyni mwyar duon trwchus yn aml, yn enwedig mewn llennyrch yn y coetir.