GWEITHREDU DROS NATUR RHONDDA CYNON TAF
Myfyrwyr Ymchwil
Mae ychydig o awgrymiadau isod am brosiectau ymchwil a fyddai’n cyfrannu i’n sylfaen dystiolaeth er mwyn ein helpu i warchod bywyd gwyllt yn RhCT. Os hoffech drafod y rhain neu os oes gennych chi syniad ar gyfer prosiect, cysylltwch â ni.
1.
Storio Carbon mewn Cynefinoedd Naturiol
Mae glaswelltiroedd, gweundiroedd, coetiroedd a mawnogydd, yn ogystal â chynefinoedd naturiol eraill, i gyd yn werthfawr o ran storio carbon. Hoffem wybod sut mae hyn yn gweithio ar lefel leol yn RhCT, fel y gallwn seilio ein gwaith i liniaru effeithiau’r newid yn yr hinsawdd ar dystiolaeth leol.
2.
Adar Nythu yn RhCT
Mae cymaint yr hoffem ei wybod am adar nythu yn RhCT. Er enghraifft, wrth i’r boblogaeth o wenoliaid du leihau, ble maent yn nythu, neu ble mae nythod titw’r helyg swil. Mae ein haelodau yng Nghlwb Adar Morgannwg yn gallu helpu i’ch rhoi ar ben ffordd.
3.
Llygod y dŵr yn ucheldir RhCT
Mae poblogaeth o lygod y dŵr wedi’i darganfod yn ddiweddar yn ucheldir RhCT a hoffem wybod rhagor am ddosbarthiad a dynameg y boblogaeth hon, er mwyn cael gwybod am y ffordd orau i’w gwarchod.
4.
Effeithiau ar afonydd o ganlyniad i adfer mawnogydd
Mae’r prosiect Mawndiroedd Coll yn brosiect partneriaeth sy’n ymdrechu i adfer arwynebedd eang o fawnogydd yn ucheldir RhCT. Pa effaith a gaiff hyn ar ein hafonydd? A fydd llai o lifogydd a llygredd? Mae angen help i gael gwybod!
5.
Dathlu treftadaeth naturiol RhCT
Rydym yn chwilio am fyfyriwr yn maes cyfathrebu neu’r cyfryngau i’n helpu i ddehongli treftadaeth naturiol ryfeddol RhCT, efallai drwy fideo, animeiddio neu waith celf. Hoffem glywed eich syniadau.
6.
Ffriddoedd ffantastig
Mae’r ffridd yn gynefin pwysig yn RhCT, yn darparu cysylltedd i fywyd gwyllt i fyny ac i lawr ochrau’r cymoedd. Byddai prosiectau sy’n tynnu sylw at hyn ac yn ein helpu i roi’r gair ar led yn rhai gwerthfawr iawn i’n helpu i warchod y cynefinoedd hyn rhag datblygu neu bwysau i blannu coed.
Astudiaeth Achos
Prosiect Adfywio Coetiroedd Prifysgol De Cymru
Nid yw’r effeithiau a geir drwy adfywio a chytrefu naturiol gan goed a choetiroedd wedi’u deall gan lawer na’u cydnabod. Yn Rhondda Cynon Taf, mae lluniau hanesyddol a dynnwyd o’r awyr yn darparu tystiolaeth glir o’r cynnydd yn y gorchudd coetiroedd brodorol o amgylch ardaloedd trefol ac ar nifer o ffriddoedd, gweundiroedd, gwlyptiroedd a phorfeydd rhos pwysig ar lethrau’r Cymoedd.
Er mwyn ceisio darparu tystiolaeth am ymlediad coetiroedd naturiol o’r fath, treialwyd dull o ddiffinio cytrefu naturiol gan goetiroedd drwy brosiect MSc ar y cyd â Phrifysgol De Cymru. Roedd yr astudiaeth MSc wedi rhoi prawf ar y defnydd o luniau hanesyddol a dynnwyd o’r awyr a lluniau cymharu cyfoes mewn ardaloedd enghreifftiol yn RhCT, ac ar y defnydd o GIS i ddehongli arwynebedd y gorchudd coed a choetir. Roedd y canlyniadau o ddull gweithredu’r prosiect yn galonogol. Fodd bynnag, bydd angen mireinio’r fethodoleg ymhellach ac mae cyfle i wneud rhagor o waith drwy brosiectau academaidd.
Y gobaith yw y bydd y dystiolaeth a gasglwyd yn dylanwadu ar lunwyr polisi ac yn caniatáu cydnabod yr ehangu naturiol gan goetiroedd sy’n digwydd yn RhCT a’i gynnwys mewn unrhyw dargedau ar gyfer ehangu coetiroedd a ddyrennir yn ganolog gan Lywodraeth Cymru neu Cyfoeth Naturiol Cymru.