Cofnodi a Monitro | RCT Action 4 Nature

Mae’r camau gweithredu hyn yn ymwneud â’r mathau o bethau y gallwn eu gwneud i annog mwy o bobl i helpu i gofnodi bywyd gwyllt lleol, datblygu eu sgiliau, eu gwybodaeth a’u mwynhad. Nid oes neb yn arbenigwr bywyd gwyllt o’i eni ac mae pawb sydd â diddordeb yn gallu cymryd rhan.

Uwchraddio Map Cynefinoedd Cam 1 RhCT

Datblygu’r Map Cynefinoedd Cam 1 ar gyfer RhCT a dod o hyd i gyllid i’w uwchraddio gan gynnwys gwybodaeth newydd am laswelltiroedd.

Annog pobl i gymryd rhan mewn arolygon cenedlaethol

Er enghraifft, Arolygon Adar Nythu BTO, Arolygon Gwenyn BBCT, Garden Dragon Watch ac arolygon o wenoliaid du. Mae’r arolygon hyn yn cynyddu ein gwybodaeth a’n dealltwriaeth o natur yn RhCT ac yn helpu i gymell pobl leol i gymryd rhan.

Cylchlythyr Cofnodwyr

Parhau i gyhoeddi cylchlythyr cofnodwyr RhCT, trysorfa o wybodaeth leol y gall pawb gyfrannu iddi.

Hyrwyddo hyfforddiant ar gyfer cofnodi cynefinoedd a rhywogaethau

Ar bob lefel, o’r lefel mynediad i’r lefel arbenigol. Helpu ein partneriaid i hwyluso a hyrwyddo hyfforddiant. Hyrwyddo adnoddau ar-lein ymarferol a gwaith maes ymarferol.

Data llinell sylfaen ar gyfer rheoli cynefinoedd

Hyrwyddo arolygon llinell sylfaen er mwyn canfod effeithiau gwaith rheoli cynefinoedd.

Astudiaeth Achos

Cylchlythyr y Cofnodwyr

Yn rhan o’r gwaith o gyflawni’r Cynllun Gweithredu Bioamrywiaeth Lleol, mae Cylchlythyr y Cofnodwyr wedi’i gyhoeddi unwaith neu ddwy bob blwyddyn ers dechrau’r 2000au. Mae’n fforwm ar gyfer adrodd a chofnodi bywyd gwyllt yn RhCT.

Mae’n dibynnu’n llwyr am ei gynnwys ar y wybodaeth a anfonir gan bobl leol ac, wrth iddo ddatblygu dros y blynyddoedd, mae anecdotau, hanes a diwylliant lleol, adroddiadau am y tywydd a llu o ddarganfyddiadau newydd a phwysig o ran bioamrywiaeth wedi dod yn rhan o’r arlwy.

Hyd yn hyn, cyhoeddwyd mwy na 30 rhifyn o Gylchlythyr y Cofnodwyr a gellir olrhain llawer o gynnwys y Cynllun Natur Lleol i arsylwadau a materion a oedd wedi cael sylw yn gyntaf yn y Cylchlythyr.

Gallwch ddarllen ôl-rifynnau o Gylchlythyr y Cofnodwyr yma